Dularfull skemmdarverk voru unnin á hlutum af lestarkerfinu í Kaupmannahöfn og á norðanverðu Sjálandi nýlega. Einhver eða einhverjir klipptu á leiðslur sem takmarka hraða lesta og stöðva þær sjálfvirkt á ákveðnum stöðum. Ef þetta hefði ekki uppgötvast hefðu afleiðingarnar getað orðið skelfilegar og lestarslys orðið.

Starfsmenn dönsku járnbrautanna uppgötvuðu skemmdarverkin aðfaranótt mánudags og tilkynntu til lögreglunnar. Um var að ræða skemmdarverk á að minnsta kosti 40 stöðum á Farum-lestarleiðinni.

Ekstra Bladet hefur eftir talsmanni lögreglunnar að hann viti ekki hvað liggi að baki þessum skemmdarverkum en málið er nú í rannsókn.

Dönsku járnbrautirnar náðu að leysa málið til bráðabirgða í gær þannig að lestir gátu notað Farum-leiðina.