Kona í Jacksonville í Flórída í Bandaríkjunum náði myndbandi fyrir stuttu sem hefur vakið mikinn óhug meðal aðdáenda Burger King. Í myndbandinu sést starfsmaður skyndibitakeðjunnar nota gólfmoppu til að þurrka af borðunum á staðnum.

Fréttastöðin News4Jax birtir myndbandið á Facebook-síðu sinni og hefur því verið deilt mörg þúsund sinnum og athugasemdirnar eru flestar á eina leið – hve ógeðslegt það sé að gólfmoppur séu notaðar til að þurrka af borðum.

Forsvarsmenn Burger King sendu yfirlýsingu til News4Jax í kjölfar birtingu myndbandsins þar sem atvikið er harmað.

„Það athæfi sem sýnt er í myndbandinu er óásættanlegt og ekki í takt við staðla okkar og vinnuaðferðir. Við höfum stranga ferla þegar kemur að hreinlæti og mataröryggi. Eigandi veitingastaðarins mun þjálfa starfsfólk sitt upp á nýtt í öllum vinnureglum.“