Leikarinn Luke Perry fékk alvarlegt heilablóðfall á heimili sínu í Los Angeles þann 27. febrúar síðastliðinn. Nokkrum dögum síðar, eða þann 4. mars, lést hann aðeins 52ja ára að aldri.
Nú segir dóttir hans, Sophie Perry, frá greftrun föður síns í hjartnæmri færslu á Instagram. Sophie segir að leikarinn hafi verið grafinn í umhverfisvænni sveppadragt frá Coeio.
Hér má sjá sveppabúninginn.
Um er að ræða búning sem kostar 1500 dollara, tæplega tvö hundruð þúsund krónur. Fatnaðurinn er búinn til úr sveppum og öðrum örlífverum sem flýta fyrir rotnun, gera eiturefni í líkamanum óvirk og færa jarðveginum öll næringarefni úr líkinu. Ekki þarf líkkistu þegar að lík er jarðað í sveppadragtinni.
„Faðir minn uppgötvaði þetta og hann varð spenntari en ég hef nokkurn tímann séð hann,“ skrifar Sophie á Instagram við mynd af sveppum sem hún sá á göngu í San Francisco.
„Hann var grafinn í þessum búningi, ein af hans hinstu óskum.“
