Leikarinn Luke Perry, sem var hvað þekktastur fyrir að leika í sjónvarpsþáttunum Beverly Hills 90210, er látinn. Hann lést á sjúkrahúsi í Burbank í Kaliforníu í dag eftir að hafa fengið heilablóðfall fyrir nokkrum dögum. Hann var 52ja ára gamall þegar hann lést.
„Hann var umkringdur börnunum sínum, Jack og Sophie, unnustu sinni Wendy Madison Bauer, fyrrverandi eiginkonu sinni Minnie Sharp, móður sinni Ann Bennett, stjúpföður sínum Steve Bennett, bróður sínum Tom Perry, systur sinni Amy Coder og nánum vinum og fjölskyldu,“ segir blaðafulltrúi leikarans í tilkynningu til Us Weekly.
„Fjölskyldan kann að meta stuðninginn og hve margir hafa beðið fyrir Luke um heim allan og biðja vinsamlegast um að einkalíf þeirra sé virt á þessum tíma sorgar. Engar frekari upplýsingar verða veittar að þessu stöddu.“
DV sagði frá því síðasta miðvikudag að leikarinn hefði fengið heilablóðfall á heimili sínu.