Ketó-mataræðið er orðið gríðarlega vinsælt og geta ketóliðar nú fengið sér ketóvæna valkosti á ýmsum veitingastöðum. Nýjasti ketó-rétturinn til að bætast við í ketó-flóruna er ketó-pítsa á veitingastaðnum Blackbox í Borgartúni.

Í 180 gramma pítsubotninum eru 9,2 grömm af kolvetnum og viðskiptavinir geta síðan ráðið sínu áleggi. Í fréttatilkynningu frá Blackbox kemur fram að mikil vinna hafi verið lögð í botninn.

„Það er búið að eyða rúmum þremur mánuðum í að smakka til uppskriftina því við vildum hafa áferðina eins og á pizzabotni og tilfinninguna þannig að það sé verið að borða pizzu,“ stendur í tilkynningunni, en eigendur staðarins eru Karl Viggó Vigfússon, Jón Gunnar Geirdal, Jóhannes Stefánsson og fjölskylda í Múlakaffi og Jóhannes Ásbjörnsson.