Skúli S. Ólafsson, sóknarprestur í Neskirkju, segir Íslendinga vera umhverfissóða. Í pistli í Fréttablaðinu hvetur hann fólk til að pæla í föstunni og fækka veisludögum.

„Allt á sér sögu og bakgrunn. Þessir tímar áts sem nú standa yfir , eru leifar af kjötkveðjuhátíð. Vikurnar fram undan, allt til páska, kallast fasta. Sú var tíðin að þá reyndi fólk að lifa og eta sparlega, gæta hófs. Þannig var það í það minnsta í gyðingdómi og í kristnum sið,“ skrifar Skúli í pistli í Fréttablaðinu.

Skúli segir föstuna vera náttúrulega og vistvæna. „Í gamla sveitasamfélaginu var hún lífsbjörg […] Nú eru veisludagar. Í gær átum við rjómabollur, í dag er sprengidagur og á morgun er öskudagur með sætindum og fjöri. Kjötkveðjuhátíðin er í fullu gildi hjá okkur, en við sleppum föstunni! Allir okkar dagar eru sprengidagar. Við sprengjum öll mörk og látum eins og næstu tímar og kynslóðir komi okkur ekki við.“

Skúli segir Íslendinga vera umhverfissóða. „Jörðin stynur undan ágangi okkar, í lofti, á láði og legi. Þar er ekkert undanskilið og Íslendingar munu vera mestu umhverfissóðarnir,“ segir Skúli og bætir við að velmegun er ekki hættulaus og deyja fleiri úr velmegun en í stríði.

Að lokum hvetur Skúli fólk til að pæla í föstunni.

„Veltum því fyrir okkur hvort það er ekki kominn tími til að minnka veisluna, fækka veisludögum svo að eitthvað verði til skiptanna fyrir börnin okkar og afkomendur þeirra.“