Oft er sagt að greiðasta leiðin til hjartans liggi í gegnum magann. Ný rannsókn sýnir hins vegar fram á að maturinn sem fólk pantar á stefnumóti segi mikið um hvort því lítist á manneskjuna sem það er á stefnumóti með.
Rannsakendur frá Austur-Karolínu í Bandaríkjunum rannsökuðu hvað sex hundruð karlar og konur borðuðu í mismunandi aðstæðum. Niðurstöðurnar sýna að bæði kyn panta hitaeiningasnauðari mat á stefnumótum ef þeim líst á einstaklinginn sem þau eru á stefnumóti með. Gerir fólk þetta til að heilla frekar tilvonandi elskhuga. Sagt er frá þessu á vef Daily Mail.
Ef einstaklingurinn sem situr á móti þér á stefnumóti er aðlaðandi að þínum mati lækkar hitaeiningafjöldi í máltíðinni þinni um allt að tuttugu prósent, samkvæmt rannsókninni.
„Það er hægt að segja að fólk fylgi möntrunni „þú ert það sem þú borðar“, borði fæðu með lítið af kaloríum til að sýnast heilsusamlegra og meira aðlaðandi í augum félagans við matarborðið,“ skrifa rannsakendur í grein í Appetite.
„Ef fólk pantar máltíð með mikið af kaloríum gæti það skilist eins og því sé sama um heilsuna.“
Af þessu má leiða að ef manneskja á stefnumóti pantar sér steik og franskar líst henni ekkert á stefnumótafélagann. Ef hún pantar hins vegar salat eru líkurnar góðar fyrir áframhaldandi samband.