Það eru eflaust margir sem hafa komið heim eftir langan dag í leik og starfi og ekki haft kraft til að elda meira en hræódýrar skyndinúðlur sem bragð er af.
Pistlahöfundur matarvefsins Delish vill sporna við þessum matarvenjum og týnir til nokkrar ástæður af hverju skyndinúðlur eru óhollar og af hverju þú ættir að hætta að borða þær strax í dag.
Pistlahöfundur segir að natríummagn í skyndinúðlum sé vissulega mismunandi eftir tegundum, en ítrekar að magnið sé alltof hátt í öllum tegundum. Þá tekur hann fram að sú mettaða fita sem sé í hverjum núðlupakka sé ekki holl neinum.
Vísindamenn hafa rannsakað hvaða áhrif núðlur hafa á líkamann og það er ekki fögur sjón. Núðlurnar sjálfar innihalda nefnilega rotvarnarefnið tertiary-butyl hydroquinone sem hefur slæm áhrif á heilsuna.
Það er ekkert sérstaklega algengt að fólk fái sér grænmeti eða ávöxt með núðlunum sínum og því eru skyndinúðlur afskaplega næringarlítill matur. Þær gera bókstaflega ekkert fyrir þig.
Rannsókn sem framkvæmd var í Baylor-háskólanum í Texas í Bandaríkjunum árið 2014 staðfesti það sem kemur fram hér að ofan en sýndi einnig fram á tengsl á milli neyslu skyndinúðla og hjartasjúkdóma í Kóreu. Matarvenjur fólks í Suður-Kóreu á aldrinum 19 til 64 voru skoðaðar, en þeir sem borðuðu skyndinúðlur tvisvar eða oftar í viku voru í meiri hættu á að þróa með sér hjartasjúkdóma.