Kærunefnd húsamála hefur úrskurðað að tveir einstaklingar sem leigðu íbúð skuli greiða leigusalanum vangoldna leigu auk dráttarvaxta. Fóru leigjendurnir úr íbúðinni án þess að skila henni formlega af sér og skildu hana eftir stórskemmda, fulla af húsgögnum og rusli og hreinlega óíbúðarhæfa.
Leigusalinn gerði ótímabundinn leigusamning við leigjendurna frá 1. júlí 2024 um leigu þeirra á íbúð hans. Krafði leigusalinn leigendurna um leigu vegna tímabilsins 1. júní til 7. júlí 2025.
Fram kom í kæru leigusalans að samkomulag hafi verið um að leigjendurnir myndu rýma íbúðina eigi síðar en 30. júní 2025. Þeir hafi þó ekki skilað íbúðinni og hún verið opin þegar umboðsmaður leigusalans hafi farið í hana 7. júlí 2025 í viðurvist lögreglu. Íbúðin hafi verið stórskemmd, óíbúðarhæf, full af húsgögnum og sorpi sem og óþrifin. Engar greiðslur hafi borist frá leigjendunum.
Kærunefnd húsamála óskaði ítrekað eftir greinargerð frá leigjendunum sem urðu ekki við því.
Í niðurstöðu nefndarinnar segir að þar með sé aðeins hægt að byggja á sjónarmiðum leigusalans og gögnum frá honum.
Nefndin segir að gerður hafi verið ótímabundinn leigusamningur en samkomulag verið gert um að leigutíma ætti að ljúka 30. júní 2025. Íbúðinni hafi þó ekki verið skilað á umsömdum degi og að endingu hafi umboðsmaður leigusalans farið í íbúðina 7. júlí þess árs. Hafi þá komið í ljós að íbúðin hafi ekki verið tæmd en þessu til staðfestingu liggi fyrir lögregluskýrsla.
Einnig liggi fyrir samskipti aðila þar sem leigusalinn hafi ítrekað beiðni um leigugreiðslu vegna júnímánaðar. Fallast verði því á kröfu leigusalans um að leigjendunum beri að greiða leigu vegna tímabilsins 1. júní til þess dags þegar leigusalinn var kominn með umráð íbúðarinnar 7. júlí 2025, samtals að fjárhæð 457.713 krónur. Í húsaleigulögum sé kveðið á um að hafi leigjandi ekki gert skil á leigunni innan sjö sólarhringa frá gjalddaga sé leigusala rétt að krefjast hæstu lögleyfðu dráttarvaxta af henni til greiðsludags. Á grundvelli þessa ákvæðis beri jafnframt að fallast á dráttarvaxtakröfu leigusalans.
Hvernig ganga mun að innheimta þetta hjá leigjendunum er erfitt að segja til um en úrskurðir nefndarinnar eru aðfararhæfir án þess að til þurfi að koma dómur. Það er því mögulegt að reyna að innheimta skuldina með aðför en leigjendurnir geta skotið úrskurðinum til dómstóla en ekki virðist líklegt að þeir geri það úr að því þeir létu málið ekki til sín taka fyrir nefndinni.
