Kristinn Hrafnsson, ritstjóri WikiLeaks, segir að aðgerðir Bandaríkjahers í Venesúela í morgunsárið marki nýja tíma. Fólk muni minnast ársins 2026 sem ársins þar sem allt breyttist.

Bandaríkjaher gerði umfangsmiklar loftárásir á Venesúela snemma í morgun og tók forseta landsins, Nicolás Maduro, og eiginkonu hans höndum og fluttu þau frá landinu.

Kristinn segir árásirnar fyrirboða um framtíð Grænlands og telur ekki ólíklegt að Ísland muni þar spila hlutverk.

„Mesta herveldi heims hefur nú formlega notað sprengjur sínar til þess að slátra alþjóðalögum endanlega og allri reglu í heiminum. Aflið mun hér eftir ráða hindrunarlaust. Skoða má atburði dagsins sem fyrirboða um framtíð Grænlands, þar sem aðstaða Bandaríkjahers á Íslandi verður að líkindum notuð í aðgerðum ef Grænland verður ekki afhent möglunarlaust.“

Eins hafi Bandaríkin gefið skýrt merki til annarra valdamikilla ríkja um hvað megi. Kínverjar séu farnir að hringsóla Taívan í stærstu heræfingu sinni til þessa og munu þeir líta á aðgerðir Bandaríkjahers í morgun sem grænt ljós á beinar hernaðaraðgerðir þar sem Kína muni aftur sölsa undir sig eyjuna. Eins hafi Trump sent skilaboð til Rússa um að innrás þeirra í Úkraínu sé eðlileg og réttmæt.

„Árið 2026 verður minnst sem ársins þar sem allt breyttist þó að aðdragandinn hafi verið ljós og ferlið langt – að minnsta kosti aldarfjórðungur. Smáríki hafa nú litlar bjargir.“