Margrét Hauksdóttir, húsmóðir og fyrrverandi ráðherrafrú, er látin, sjötug að aldri. Hún varð bráðkvödd í sumarhúsi sínu á Hallandaengjum í Flóa í fyrradag. Morgunblaðið greinir frá andláti hennar.

Margrét var húsmóðir og ráðherrafrú en eftirlifandi eiginmaður hennar er Guðni Ágústsson, fyrrverandi þingmaður og ráðherra.

Margrét fæddist þann 3. apríl 1955 og ólst upp á Stóru-Reykjum og gekk í Þingborgarskóla. Þaðan lá leiðin í Gagnfræðaskólann á Selfossi og svo í Húsmæðraskólann í Reykjavík.

Guðni og Margrét eignuðust þrjár dætur; Brynju (1973), Agnesi (1976) og Sigurbjörgu (1984).

Í umfjöllun Morgunblaðsins kemur fram að ævistarf Margrétar á fyrri árum hafi verið ýmis þjónustu- og umönnunarstörf á Selfossi og í Reykjavík. Hún fylgdi svo Guðna í störfum hans sem embættismaður.

Margrét og Guðni héldu heimili bæði á Selfossi og í Reykjavík og festu kaup á íbúð í miðbæ Selfoss þar sem þau bjuggu í nokkur ár. Þau voru nýlega flutt aftur til Reykjavíkur þegar hún lést.