Ragnar Þór skrifar aðsenda grein á Vísi þar sem hann segist hafa verið að renna yfir níu mánaða uppgjör bankanna þriggja: Arion, Landsbankans og Íslandsbanka.
„Það sem er áhugavert, lesist ógeðfellt, er að arðsemi bankanna hækkar verulega á þriðja ársfjórðungi þessa árs. Arion fer úr 12,9% í 16,1%. Íslandsbanki fer úr 11% í 13,2% og Landsbankinn fer úr 10,9% í 14%. Á sama tíma eru skuldsett heimili og fyrirtæki að berjast í bökkum við að halda sér á lífi. Þeim er að blæða út. En það er meira,“ segir Ragnar.
„Samanlagðar hreinar vaxtatekjur bankanna þriggja, fyrstu 9 mánuði ársins, voru 115,5 milljarðar. Samanlagðar þjónustutekjur bankanna þriggja, fyrstu 9 mánuði ársins, voru 29,6 milljarðar. Samanlagður hagnaður bankanna þriggja, fyrstu 9 mánuði ársins voru 62,7 milljarðar.“
Ragnar Þór bendir á í grein sinni að upphaflegur áætlaður kostnaður við uppkaup á öllu húsnæði Grindvíkinga hafi verið um 60 milljarðar króna, en endanlegur kostnaður verði líklega nær 74 milljörðum.
„Hreinar vaxtatekjur og þjónustugjöld bankanna þriggja nemur tvöfaldri þeirri upphæð, á níu mánuðum. Á sama tíma fækka bankarnir starfsfólki, skerða þjónustu og loka útibúum, og byggja höfuðstöðvar á dýrasta stað. Tvöföld upphæð sem kostaði að kaupa húsnæði heils bæjarfélags! Þrír bankar! Níu mánuðir!,“ segir hann.
Ragnar spyr hvort allir séu að leggja sitt af mörkum í baráttunni gegn hárri verðbólgu og vöxtum. Hann segir að svarið við þeirri spurningu sé nei ef marka má níu mánaða uppgjör bankanna og stærstu fyrirtækja á markaði.
„Raunstýrivextir (vextir umfram verðbólgu) eru 3,9% og 5,6% ef við notum samræmda vísitölu Eurostad. Og nei, þetta er ekki krónunni að kenna! Þetta er efnahagsstjórnin sem við búum við. Þetta er efnahagsstjórninni að kenna, engu öðru og engum öðrum en þeim sem henni stjórna.“
Ragnar nefnir svo að í Danmörku bjóðist fastir óverðtryggðir 2,33 vextir í 5 ár (F5 lán) en á Íslandi séu þeir 8,75% til 9,75%.
„Verðbólga í Danmörku er 1,20%. Á íslandi eru breytilegir óverðtryggðir vextir á húsnæðislánum frá 10,75% til 11,75% og verðtryggð húsnæðislán á 4,6% til 5,8% vöxtum.
Í öllum samanburði búum við á Íslandi við ástand sem hvergi þætti boðlegt meðal samanburðarþjóða,“ segir Ragnar sem bætir við að við búum við efnahagsstjórn sem er knúin áfram í þágu fjármagns og sérhagsmuna.
„Við þurfum að vakna og það er hlutverk okkar sem erum í framlínu hagsmunabaráttu launafólks og stjórnmála að fræða, og ögra ríkjandi hugmyndafræði. Boða breytingar og hafa kjark til að fylgja þeim eftir. Gefa fólkinu okkar von og framtíðarsýn. Því við getum ekki látið þetta viðgangast lengur. Ef við viljum breytingar þá verðum við að kjósa breytingar.“
