Brjánn Jónsson lýsir yfir miklum vonbrigðum með verslun Góða hirðisins í færslu á Facebook-síðu áhugamanna um endurvinnslu og endurnýtingu. Þar segist hann ekki skilja reksturinn lengur, en ljóst sé að markhópur reksturins hafi breyst.
Brjánn segist muna að þegar Góði hirðirinn hóf rekstur sinn hafi tilgangurinn verið sá að veita fólki sem ekki hefði mikið milli handanna stað til að kaupa sér hluti á heimili sitt, allt í nafni endurnýtingar svo ekki þurfi að henda nothæfum hlutum.
„Eftir mörg ár utan landsteina fór ég þarna fyrir nokkrum dögum. Með einstæðri móður, sem átti ekkert og ætlaði ađ hjálpa henni. Versla allt á einum stað, svona rétt til ađ koma henni af stað.
Mér blöskraði verðlagningin á rusli annarra.“
Brjánn fann í versluninni eldhúsborð sem kostaði 20.000, en sambærilegt var til sölu á markaði Facebook á 5.000 kr. Eins fann hann stóla sem kostuðu fjórir saman 30.000. Sambærilegir kostuðu á Facebook 8.000.
„Tek þetta tvennt bara sem dæmi því ég fann alveg eins hluti á Facebook á margfalt minna.“
Hann hafi í kjölfarið sest niður með þessari ungu konu í um tvo tíma og skoðað Facebook og bland.is. Þannig hafi þau náð að versla allt sem henni vantaði fyrir sig og dóttur sína á 85.000 kr.
„Sófi, sófaborð, eldhúsborð, stólar, rúm, kommóða x2, hillur, fataskáp, sjónvarp og sjónvarpsskáp. Ásamt nokkrum smáhlutum.
Fyrir utan nokkra hluti gefins, eins og barnarúmið og fleira fyrir barnið t.d.
Þar fyrir utan, þá fór ég með hana í Húsasmiðjuna og keypti nýtt pottasett (2x pottar, 2x pönnur, pískur, spaði, ausa og fiskspaði. Mjög flott sett), sem reyndist ódýrara en að gera samtýning af hinu og þessu mismunandi „rusli“ í Góða hirðinum. Diskarnir, glös og hnífapör. Hugsa það hafi reyndar sirka endað á pari, en nýtt.
Allt í allt rúmar 110.000,-„
Brjánn segir að þannig hafi þau fengið allt sem móðurinni vantaði fyrir brot af því sem það hefði kostað í Góða hirðinum.
„En svona grínlaust!!!
Miðað við verðlagningu Góða hirðisins á rusli annara, hefðum við ekki fengið helminginn af því sem keypt var fyrir sama pening í GH Design [Góða hirðinum]. hefði verið nær og örugglega yfir 200.000. Fyrir utan. Það selst ekkert af því sem mér heyrist út af okurverðum. Það er orðið dýrara að versla notað þarna en nýtt í rúmfó og IKEA. Sem þýðir að rosalega mikið magn fer í urðun í staðinn. Ef engin er hreyfingin. Sem kemur út á það sama. Þessi staður er búinn að missa marks.
Finnst komin tími til að breyta nafninu í Okur Hirðirinn.“
Brjánn telur ljóst að markhópur Góða hirðisins sé ekki sá sami og hann var þegar reksturinn hófst fyrst.
Þetta er ekki í fyrsta sinn sem verðlagning í Góða hirðinum er gagnrýnd. Fyrir tæpu ári mátti í versluninni finna stól sem kostaði hvorki meira né minna en hálfa milljón, en var þá að ræða dýrustu vöru markaðrins frá upphafi. Um var reyndar að ræða danskan hönnunarstól sem rekstrarstóri taldi vera mikils virði. Síðar kom á daginn að sambærilegir stólar höfðu verið að seljast á uppboðum á í kringum 51 þúsund krónur.
