ÁTVR hefur áfrýjað frávísun héraðsdóms á máli ríkiseinokunarfyrirtækisins ÁTVR sem það höfðaði gegn fyrirtækjunum Sante og Bjórlandi. Úrskurðurinn féll í héraðsdómi í síðustu viku Arnar Sigurðsson, vínkaupmaður og forstjóri Sante, sagði við Fréttablaðið þegar niðurstaðan lá fyrir að frávísunarúrskurður héraðsdóms staðfesti að „ÁTVR njóti ekki lögvarinna hagsmuna“ í málinu.
Í niðurstöðu héraðsdóms segir að ÁTVR hafi mistekist að sýna fram á lagagrundvöll lögvarinna hagsmuna sinna. ÁTVR hafði haldið því fram að markmiðsákvæði laga um Áfengis- og tóbaksverslun ríkisins og lýðheilsusjónarmið dugðu til, en dómstóllinn var því ósammála.
Bjarni Benediktsson, fjármálaráðherra og æðsti yfirmaður Áfengis- og tóbaksverslunar ríkisins hafði áður sagst ekki sjá flöt fyrir áfrýjun í málinu. Lét Bjarni hafa eftir sér í samtali við Morgunblaðið í gær að loknum ríkisstjórnarfundi við Ráðherrabústaðinn að dómurinn væri „ágætlega rökstuddur“ að hans mati og að ekki væri tilefni til áfrýjunar.
ÁTVR hafði krafist þess að lögbann yrði lagt á starfsemi fyrirtækjanna hér á landi og 50 þúsund króna dagsektir yrðu lagðar á fyrirtækin yrðu þau ekki við lögbanninu. Þá krafðist ÁTVR bóta vegna tjóns sem að það hefði orðið fyrir vegna smásölu áfengis í vefverslunum fyrirtækjanna tveggja sem og að fyrirtækin bættu ÁTVR upp tilfallinn málskostnað.
Raunkostnaður vegna málshöfðunarinnar er óljós, en þó sagði DV frá því í september í fyrra að ÁTVR hefði þá þegar kostað til sjö milljónum vegna málaferlanna. Gera má ráð fyrir að sú tala hafi hækkað umtalsvert síðan þá.
Ívar J. Arndal er forstjóri ÁTVR. Ívar sagði sjálfur í umsögn um frumvarp til laga sem Alþingi hefur nú til afgreiðslu sem myndi heimila innlenda vefverslun með áfengi, að rekstrargrundvöllur ÁTVR væri háður því að ríkiseinokunarfyrirtækið héldi einokunarstöðu sinni óbreyttri.
Ef marka má orð forsvarsmanna ÁTVR, má ætla að framtíð sjálfrar Áfengis- og tóbaksverslunar ríkisins sé nú undir Landsrétti komið.
