Rússneska fjarskiptaeftirlit Rússlands, Roskomnadzor, hefur farið fram á að Google hætti að dreifa „fölskum upplýsingum um sérstöku hernaðaraðgerðirnar“ í Úkraínu í gegnum auglýsingar á YouTube.

Í bréfi sem Roskomnadzor hefur sent Google er því haldið fram að fölskum upplýsingum um eðli „sérstakra hernaðaraðgerða“ Rússlands í Úkraínu sé deilt í gegnum þær auglýsingar sem birtist notendum á YouTube. Með þessum upplýsingum sé verið að afvegaleiða skoðanir rússneska borgara og hvetja til mótmæla.

Stjórnendur YouTube ættu að hætta að sýna slíkar auglýsingar til rússneskra notenda. Þær brjóti gegn rússneskum lögum og séu þar að auki aðgengilegar börnum sem brjóti gegn bæði rússneskum reglum um aldurstakmörk sem og gegn reglum YouTube um slíkt.

Rússland berst nú hart gegn þeim upplýsingum sem hafa birst um stöðuna í Úkraínu. Fjölmiðlum þar innanlands hefur verið meinað að tala um innrásina sem stríð og var í morgun lögfest lagabreyting sem þýðir að fólk á yfir höfði sér allt að 15 ára fangelsi fyrir að deila efni sem rússnesk yfirvöld flokka sem „falskar upplýsingar“ um aðgerðir rússneska hersins.

Rozkomnadzor hefur staðið í ströngu. Eftirlitið hefur farið fram á við rússneska fjölmiðla að þeir byggi fréttaflutning sinn aðeins á opinberum upplýsingum frá rússneskum stjórnvöldum en það séu einu „áreiðanlegu upplýsingarnar“ sem séu í boði. Eins hefur eftirlitið krafist þess að Wikipedia fjarlægi upplýsingar um stöðuna þar sem talað er um stríð og þær meintu þúsundir rússnesku hermanna sem hafa fallið í valinn.

Rússnesk stjórnvöld hafa einnig beitt sér gegn Twitter, Facebook og Instagram og takmarkað aðgang rússneskra notenda að þessum miðlum til að koma í veg fyrir að þeir sjái upplýsingar sem rússnesk yfirvöld hafa ekki ritstýrt.

Sjá einnig: Rússar reiðir Wikipedia – Krefjast þess að „falskar upplýsingar“ verði fjarlægðar