Færslu Ingþórs Ásgeirssonar þar sem hann birtir mynd af manni sem hann segist hafa gómað við innbrot í Efstaleiti í Reykjavík í gær hefur nú farið sem eldur um sinu í netheimum. Þegar þetta er skrifað hefur henni verið deilt rúmlega fimm hundruð sinnum.
Í færslunni segir höfundur hennar, Ingþór Ásgeirsson, að hasar hafi verið í Efstaleitinu hjá sér. „Búið var að brjótast inn í nokkra bíla, lögreglan kom og tók skýrslu og að því loknu kom í ljós að einnig var búið að brjótast inn í geymslur hjá íbúum, þá kom einhver ónotatilfinning hjá mér sem leiddi til þess að ég tók labbið um alla ganga,“ skrifar Ingþór í færslunni víðförlu.
Ingþór lýsir því þá að hann hafi rekist á grunsamlegan aðila sem hann tók á tal en þegar hann sagðist ekki vera tilbúinn til viðræðna smellti hann mynd af kauða, sem Ingþór birti með í færslu sinni.
„Lenti í smá stimpingum við að halda honum sem endaði á því að aulinn slapp,“ skrifar hann jafnframt og segist þá hafa hlaupið á eftir honum en ekki haldið í við hann, enda á flatbotna inniskóm.
Ingþór segir þá jafnframt að hamaganginum hafi loks lokið með því að hinn meinti þjófur hafi verið handtekinn. „Líklega verður honum sleppt að loknum yfirheyrslum svo hann geti haldið áfram iðju sinni,“ skrifar Ingþór.
Sem fyrr segir, birtir hann jafnframt mynd af manninum og biður um að henni sé dreift sem víðast og biður fólk um að hringja á lögregluna um leið, verði það vart við manninn.
Samkvæmt heimildum DV hlaut umræddur maður fimm ára fangelsi fyrir tilraun til manndráps árið 2014 en það sama ár stakk hann annan mann með hníf þannig að litlu munaði að mannskaði hlytist af. Kom fram fyrir dómi að aðeins munaði nokkrum sentimetrum að hnífurinn hefði lent í hjarta fórnarlambsins. Í skýrslu geðlæknis fyrir dómi kom jafnframt fram að hegðun mannsins mætti rekja til mikillar notkunar fíkniefna.
Hæstiréttur staðfesti síðar dóm héraðsdóms.