Íslenskur sæþotugarpur (JetSki) sem var að stunda sport sitt í Kalmar-sundinu í Svíþjóð hefur verið týndur síðan á laugardag. Maðurinn hafði haldið til á eyjunni Öland, á tjaldsstæði sem ber heitið Lundegård Camping.
Íslenskur frændi mannsins, Víðir Víðisson, og tveir vinir hans, Ólafur Ragnar Ólafsson og Björn Loftsson, héldu til Svíþjóðar og leita nú að hinum týnda með aðstoð kafara og dálítils hóps leitarfólks.
„Við erum í kringum 15 manns, bara ættingjar og vinir,“ segir Víðir í samtali við DV, sem náði tali af honum rétt áður en hann hélt út til leitar. Aðspurður sagði hann að leitarskilyrði væru ekki mjög hagstæð í dag: „Það er frekar hvasst núna og erfiðar aðstæður úti á sjó.“
Víðir segir litla hjálp að hafa frá sænskum yfivöldum sem hafi þó leitað fyrsta daginn. „Svo var haft samband við samtökin Missing People hér í Svíþjóð og þau hafa auglýst eftir sjálfsboðaliðum við leitina en það hafa mjög fáir boðið sig fram,“ segir Víðir og virðist honum sem önnur viðhorf ríki hjá bæði yfirvöldum og almenningi í Svíþjóð en á Íslandi þegar kemur að leit að fólki í hrakningum eða fólki sem er saknað.
„Við erum bara gamlir sjósleðamenn og krossarar sem fóru út á Jet-skiin sín og erum að þræða svæðið í leita að okkar týnda félaga,“ segir Víðir.
En leiðangurinn er fjárfrekur og þeir félagar þurfa á stuðningi að halda:
„Núna vantar okkur fjárhagslegan stuðning þannig að ég hef ákveðið að stofna reikning fyrir þann styrk og borga ég þær græjur sem þarf fyrir þann stuðning sem við þurfum og afgangurinn mun fara inn á eiginkonu frænda míns,“ segir Víðir. Þá félaga skortir fé fyrir dróna, mat, gistingu og fleira, auk þess sem þeir vilja styrkja eiginkonu Íslendingsins sem er saknað.