Landspítalinn hefur sent til fjölmiðla yfirlýsingu vegna máls Skúla Tómasar Gunnlaugssonar, fyrrverandi yfirlæknis á Heilbrigðisstofnun Suðurnesja (HSS), en Skúli sætir lögreglurannsókn vegna gruns um að bera ábyrgð á dauða sex sjúklinga.

Skúli missti lækningaleyfi sitt tímabundið eftir niðurstöðu Landlæknis í máli konu sem Skúli setti á lífslokameðferð að ósekju, er hún kom til hvíldarinnlagnar á HSS. Honum var síðan veitt takmarkað starfsleyfi og hóf störf á Landspítalanum. Fyrir skömmu síðan var takmarkað starfsleyfi Skúla endurnýjað í eitt ár. Hefur það vakið mikla gagnrýni.

Í yfirlýsingu Landspítalans er Skúli ekki nefndur á nafn en sagt að hann hafi verið í endurmenntunar- og þjálfunarferli á Landspítalanum, undir handleiðslu og nánu eftirliti sérfræðinga:

„Landspítali hefur kynnt sér þær upplýsingar sem fram koma í úrskurði Héraðsdóms Reykjaness frá því 4. nóvember og staðfestur var í Landsrétti nýlega. Spítalinn mun fylgjast með framvindu þessa máls, bæði hjá lögreglu og embætti landlæknis, og grípa til aðgerða um leið og tilefni er til. Embætti landlæknis veitti viðkomandi heilbrigðistarfsmanni endurnýjun á takmörkuðu lækningaleyfi í byrjun nóvember á þessu ári og gildir það til 12 mánaða. Á grundvelli hins takmarkað leyfis frá landlækni hefur umræddur læknir verið í endurmenntunar- og þjálfunarferli á Landspítala, undir handleiðslu og nánu eftirliti sérfræðinga spítalans í lyflækningum.“