Rannsókn á andláti manns í Sundhöll Reykjavíkur er nú á frumstigi að því er heimildir DV herma. Málið er rannsakað sem vinnuslys.
DV sagði frá því á fimmtudaginn að lögregla og sjúkralið hafi verið kallað út klukkan 12:02 að Sundhöll Reykjavíkur vegna manns sem fannst hreyfingarlaus á botni innilaugar Sundhallarinnar. Samkvæmt upplýsingum frá lögreglu á föstudaginn var málið þá skráð sem „endurlífgun“ í þeirra bókum. Maðurinn var endurlífgaður á staðnum og fluttur á sjúkrahús þar sem hann lést síðar.
Maðurinn sem um ræðir var 31 árs gamall og glímdi við undirliggjandi veikindi, að því er sagði í tilkynningu lögreglunnar um málið síðastliðna helgi. Morgunblaðið ræddi í gærkvöldi við Guðna Heiðar Guðnason, faðir drengsins sem lést. Kvaðst Guðni ósáttur við yfirlýsingu Margeirs Péturssonar aðstoðaryfirlögregluþjóns um undirliggjandi veikindi sonar síns og segir þau ekki hafa þurft að leiða til dauða hans.
Hinn látni starfaði í geðþjónustu og var með skjólstæðingi sínum í sundlauginni er slysið bar að. Samkvæmt Guðna barst honum fyrst fregnir af andláti sonar síns frá fjölskyldu skjólstæðingsins.
Guðni gerir jafnframt alvarlegar athugasemdir við sundlaugarvörslu í Sundhöll Reykjavíkur og spyr hvernig það geti gerst að hann liggi þar í sex mínútur áður en hans verður vart. Sundhöll Reykjavíkur á að vera útbúinn búnaði sem lætur sundlaugarverði vita ef eitthvað liggur hreyfingarlaust á botni laugarinnar í meira en 15 sekúndur.
Í samtali við DV sagði Ómar Einarsson, sviðsstjóri Íþrótta- og tómstundasviðs Reykjavíkurborgar að allar sundlaugar borgarinnar væru útbúnar öryggismyndavélum en gat ekki sagt hvort umræddur búnaður hafi verið á staðnum eða ekki. Verið væri að skoða annan útbúnað í sundlauginni og von væri á tilkynningu um málið.
Næstu skref í rannsókn málsins hjá lögreglunni verða þau að komast að dánarorsök og mun því krufning fara fram. Samkvæmt Jóhanni Karli Þórissyni, aðstoðaryfirlögregluþjóni hjá Lögreglunni á höfuðborgarsvæðinu er viðbúið að krufningin muni fara fram í þessari eða næstu viku. Segir hann að næstu skref í rannsókninni muni skýrast af niðurstöðum hennar.
Ekki náðist í Margeir Pétursson aðstoðaryfirlögregluþjón við vinnslu þessarar fréttar.
