Ekki þarf lengur rökstuddan grun um að verið sé að fremja alvarlegt brot á lögum svo lögregluyfirvöld á Íslandi geti beitt sérstökum rannsóknaraðferðum. Aðferðir á borð við dulargervi, flugumenn, tálbeitur, uppljóstrara og stöðuga eftirför með grunuðum án þeirra vitundar verða nú heimilaðar ef um er að ræða einhvern „grun“ á því að verið sé að fremja alvarlegt lögbrot.

Reglugerðarbreytingin sem heimilar þetta tók gildi þann 17. maí síðastliðinn en Vísir greindi frá og vakti athygli á þessari breytingu fyrr í dag. Með breytingunni verður svigrúm lögreglu til að nota umræddar aðgerðir mun meira þar sem einungis þarf grun, ekki að hann sé einnig rökstuddur.

Munurinn á grun og rökstuddum grun er töluverður. Til að grunur sé rökstuddur þarf að hafa gögn sem rökstyðja einmitt gruninn. Án rökstuðnings er grunur mun opnara hugtak og því er auðveldara að sýna fram á að um grun sé að ræða.

Þá var ekki aðeins rökstuðningurinn tekinn úr reglugerðinni heldur var auk þess bætt við brotum sem eiga við þennan grun. Fyrir breytinguna þurfti brotið að varða 8 ára fangelsi eða þá líkamlegt ofbeldi, skipulagða glæpastarfsemi og fleiru. Nú má lögreglan einnig beita aðferðunum ef grunur er um njósnun, þáttöku í hryðjuverkasamtökum, mútun opinberra starfsmanna og sjálfsþvætti.