Catalina Ncogo heldur því fram að hún hafi sannanir fyrir því að Sölvi Tryggvason fjölmiðlamaður hafi beitt konur ofbeldi. Þetta kemur fram á mbl.is og samfélagsmiðlum Catalinu.
Catalina, sem dæmd hefur ákærð fyrir mansal og vændisrekstur og sakfelld fyrir síðarnefnda brotið, segir að sönnunargögn sín séu í formi myndbanda.
DV hefur undir höndum skjáskot af broti af samtali milli Catalinu og Sölva. Þar sakar hún Sölva um að hafa svikið sig og segir að enginn komist upp með það. Tími sé kominn til að hún borgi fyrir sig.
Sölvi hefur lýst því yfir síðustu daga að sögusagnir um að hann hafi beitt konu eða konur ofbeldi séu helber þvættingur. Í eftirminnilegu myndbandsviðtali við lögmann sinn í gærkvöld lýsti hann því hvaða áhrif sögusagnirnar hefðu haft á sig og sína nánustu. Brotnaði hann niður í viðtalinu. Hann segist hafa haft samband við lögreglu um miðjan mars er honum var hótað mannorðsmissi og í kjölfar þess hafi sögusagnirnar hafist.
Í viðtali við mbl.is segist Catalina vera konan sem hótaði Sölva mannorðsmissi í mars. Samkvæmt heimildum DV er hún hins vegar ekki konan sem Sölvi átti við í viðtali sínu við lögmann sinn.
