„Þórólfur hefur gefið út að við erum að bíða eftir að fá samningsdrög og við vonumst eftir samningsdrögum á fundinum,“ segir Kjartan Hreinn Njálsson, aðstoðarmaður Landlæknis, í stuttu spjalli við DV um stöðuna varðandi viðræður Íslendinga við lyfjaframleiðandann Pfizer um rannsóknarverkefni sem felur í sér bólusetningu stórs hluta þjóðarinnar með bóluefni Pfizers við Covid-19.

Ekki náðist í Þórólf Guðnason sóttvarnalækni en embætti sóttvarnalæknis heyrir undir Landlæknisembættið. Kjartan var ekki með tímasetningu fundarins við Pfizer-menn á hreinu en taldi að fundinum yrði lokið kl. 17 eða 18 að íslenskum tíma. „Aðeins Þórólfur veit nákvæmlega hvenær fundurinn verður,“ sagði Kjartan.

En hverjir sitja þennan mikilvæga fund fyrir Íslands hönd? Kjartan segir það öruggt að Þórólfur og Kári Stefánsson, forstjóri Íslenskrar erfðagreiningar, sitji fundinn. „Það er hugsanlegt að nokkrir íslenskir vísindamenn sitji fundinn sem áheyrnarfulltrúar en síðan verða þarna vísindamenn frá Pfizer,“ segir Kjartan.

Kjartan segist ekki eiga von á því að nokkuð verði gefið út um efni fundarins í dag eða kvöld en líklega berist einhver tilkynning um hvað fór fram á fundinum á morgun. Kjartan telur nánast útilokað að efnt verði til blaðamannafundar eða opins upplýsingafundar á morgun um málið og því síður í dag eða kvöld.

„Það er ekki í kortunum að halda kynningarfund á morgun. Við höfum ríka upplýsingaskyldu við almenning en við höfum líka upplýsingaskyldu við yfirvöld og Þórólfur mun fyrst upplýsa sinn ráðherra [Svandísi Svavarsdóttur, heilbrigðisráðherra – innsk. DV] um hvað fór fram á fundinum,“ segir Kjartan.

Miklar sögusagnir hafa verið í samfélaginu um yfirvofandi fjöldabólusetningu með bóluefni frá Pfizer. Ljóst er að þær sögur hafa ekki verið með öllu úr lausu lofti gripnar en staða málsins skýrist á morgun.