Í dag fer fram þriðja verkfallið hjá félagsmönnum Eflingar sem vinna hjá Reykjavíkurborg. Félagsmenn í verkfalli eiga rétt á að fá greiðslur fyrir launatap úr verkfallssjóði. Starfsmaður hjá leikskóla í Reykjavíkurborg segir það sýna hversu léleg launin eru að greiðslan úr verkfallssjóði fyrir hvern dag er hærri en launin sem fást fyrir hvern unninn dag.
Fyrir heilan dag í verkfalli fá félagsmenn Eflingar greiddar 18 þúsund krónur úr verkfallssjóði. Starfsmaðurinn sem ræddi við DV vinnur alla virka daga í mánuði og fær fyrir það 332 þúsund krónur. Í janúar mánuði vann hann 23 daga og fær því 14.435 krónur fyrir hvern dag sem hann vinnur. Hann fær því 3.565 krónum meira fyrir hvern dag sem hann er í verkfalli. Ef hann hefði verið á verkfallslaunum í janúar þá hefði hann fengið 414 þúsund krónur í laun fyrir skatt, 82 þúsund krónum meira en hann fékk frá Reykjavíkurborg.
Starfsmaðurinn segir þessa kjarabaráttu vera mikilvæga þar sem launin séu allt of lág. Sjálfur er hann í betri stöðu en aðrir þar sem hann býr ennþá heima hjá foreldrum sínum en hann skilur ekki hvernig það á að vera hægt að lifa af þessum launum og sjá um fjölskyldu og reka heimili. „Þessi laun eru í rauninni bara hlægilega lág. Það er starfsmaður sem vinnur með mér sem hefur unnið á leikskóla mörgum árum lengur en ég, samt er hann á nánast sömu launum og ég. Þetta er ekkert annað en fáránlegt.“
Eins og áður kemur fram fer fram þriðja verkfallið í dag en það hófst klukkan 12:30 og stendur yfir til miðnættis. Næstu tvo daga verða síðan sólarhringsverkföll ef ekki næst að semja. Næsta mánudag hefst svo ótímabundið verkfall ef samnningar hafa ekki enn nást.
