Dómur var í dag kveðinn upp í Héraðsdómi Suðurlands yfir fimm ungmennum sem ákærð voru fyrir ólögmæta nauðung, húsbrot og kynferðislega áreitni. Þeim var gefið að sök hafa ruðst inn á ungan mann, yfirbugað hann, klippt af honum hár með hrossháraklippum og rakað af honum hár með rafmagnsrakvél. Þá var kona í hópnum sökuð um að hafa sett rafmagnsrakvélina sem var í gangi á milli rasskinna mannsins, við endaþarm hans.
Af þessu hlaut þolandinn hrufl og nokkur grunn sár í hársverði á nokkrum stöðum, grunn sár og bólgu á enni, mar á hægri olnboga og í kringum báða úlnliði, stirðleika í hálsi, eymsli við endaþarm og missti nær allt hár af höfði sér.
Árásin var tilkomin vegna þess að maðurinn var sagður eiga í kynferðissambandi við 18 ára stúlku sem féll hópnum illa í geð.
Þrátt fyrir að sannað þætti að fólkið hefði gerst sekt um þessa háttsemi voru þau öll sýknuð. Annars vegar vegna þess að brotið samræmdist ekki ákvæðum laga um ólögmæta nauðung og hins vegar vegna þess að málið væri fyrnt. Árásin átti sér stað árið 2016 en ekki var ákært fyrr en 2019. Tók rannsókn lögreglu um þrjú ár.
Voru fimmmenningarnir því sýknuð og bókakröfum þolandans var hafnað.
