Enn takast þeir Kári Stefánsson og Haukur Arnþórsson stjórnsýslufræðingur á í aðsendum greinum. Í gærdag sagði DV frá orðum Hauks í aðsendri grein á Vísir.is þar sem hann ræðst á Íslenska erfðagreiningu. Sagði Haukur ÍE hafa óheftan aðgang að lífsýnum Íslendinga í gegnum Covid-19 skimanir sínar. Þá sagði hann leynd hvíla yfir meðferð gagnanna og spurði hvert lífsýnin færu.
Þessu svarar Kári Stefánsson hraustlega, eins og von var á, í grein sinni í gærkvöldi, „Glórulaus vitleysa.“
Í greininni fer Kári yfir staðhæfingar Hauks og svarar þeim lið fyrir lið. Þá segir Kári að Haukur virðist helst á þeirri skoðun að flest það sem íslensk heilbrigðisyfirvöld hafa gert sé rangt, en það sem Svíar hafa gert sé rétt og göfugt. Í þessu ljósi bendir Kári segist þessu ósammála, þar sem Svíar hafi „varpað og veikum fyrir ætternistapa.“ Það sé ekki samfélag sem Kári vill búa í. Segir Kári:
Kannski Haukur sé mér sammála um þetta atriði málsins en honum finnist eldri borgarar landsins geti einfaldlega dáið drottni sínum af þessari veiru fyrst þeir höfðu ekki vit á því að kjósa hann sem formann félags síns (ég er viss um að Haukur er mér sammála um að þetta sé virkilega slæmur brandari).
Kári bendir Hauki svo á að þjóðin hafi aldrei hafnað sýnatöku Íslenskrar erfðagreiningar, líkt og Haukur heldur fram. Meira en helmingur þjóðarinnar hafi skrifað undir upplýst samþykki fyrir sýnatökunni og sé það líklega fjölmennasta staka athæfi sem þjóðin hefur nokkru sinni tekið þátt í utan kosninga. „Hitt er svo líka rangt, að ÍE sé að safna lífsýnum sem aldrei fyrr. Það er ekkert átak í gangi hjá okkur til þess að safna miklu magni af lífsýnum,“ sagði Kári.
Þá fjallar Kári um eign bandaríska félagsins Amgen á Íslenskri erfðagreiningu, en Haukur gerði að því skóna að uppgötvanir ÍE nýttust því fyrst og fremst bandarísku lyfjafyrirtæki frekar en almenningi. Kári svarar:
Íslensk erfðagreining birtir allar uppgötvanir sem eru gerðar í fyrirtækinu eins hratt og mögulegt er þannig að þær eru öllum lyfjafyrirtækjum aðgengilegar til þess að nýta, ekki bara Amgen. Við höfum oft sagt þetta opinberlega og þar með er það partur af upplýstu samþykkjunum sem þátttakendur skrifa undir. Það er hins vegar hagur sjúklinga að það sé í það minnsta eitt lyfjafyrirtæki sem vilji eyða í það orku að skoða uppgötvanir um sjúkdóma þeirra með það í huga að búa til lyf. Það er ekki alltaf sjálfgefið að svo sé.
Þá benti Kári enn og aftur á það að ÍE á ekki gagnasafn sem það hefur í vörslu sinni, heldur sé það eign íslensku þjóðarinnar. Segir Kári ekki geta gefið það sem það á ekki.
Kári gaf svo ekki mikið fyrir staðhæfingar Hauks um að rannsóknir ÍE væru án samþykkir vísindasiðanefndar: „Það er nokkuð ljóst á þessari staðhæfingu Hauks að hann hefur tekið sér fasta búsetu út í mýri.“ Sagði Kári að öll sýni, stroka úr nefholi og munni, væru hent í ruslið eftir að búið væri að leita að veirunni og eftir atvikum, raðgreina veiruna.
Kári lýkur máli svo á að benda á að ásakanir Hauks séu alvarlegar, svo alvarlegar raunar að Kári útilokar ekki að hann verði látinn bera ábyrgð á þeim orðum fyrir dómstólum.