Í sumar var fjallað um hið svokallaða Tréspíramál, þegar að níu manns létust eftir að hafa drukkið tréspíra á Þjóðhátíð í Eyjum árið 1943. Þar að auki veiktust margir og voru tuttugu lagðir inn á spítala.

Ragnar Jónsson, bæklunarlæknir og lögfræðingur hefur mikið fjallað um Tréspíramálið, meðal annars í Læknablaðinu. Ragnar var svo gestur í Bítinu á Bylgjunni í morgun, þar sem hann ræddi einmitt um þetta óhugnalega mál.

Sagan byrjar á ansi undarlegan hátt þegar að þriggja manna áhöfn fann járntunnu á reki nálægt Þrídröngum, vestan Vestmannaeyja. Mennirnir eiga að hafa dregið tunnuna um borð og fundið þar af leiðandi mikla spíralykt.

Þremenningarnir sem fundu umrædda tunnu skiptu innihaldinu á milli sín þannig að hver fékk um það bil 50 lítra. Svo virðist þó vera sem þeir hafi verið meðvitaðir um að innihald tunnunnar væri mögulega hættulegt. En einn þeirra leitaði til héraðslæknis sem á að hafa sagt að ekki væri um tréspíra að ræða.

Ragnar lýst því í Bítinu að vegna veðurfars hafi minna verið djammað.

„Þjóðhátíðin byrjar á föstudegi, og svo gerir vont veður aðfaranótt laugardags þannig að það varð ekki jafnmikið um hátíðarhöld. Það hefur sjálfsagt bjargað mörgum mannslífum.“

„Síðan heldur hátíðin áfram og þessu er dreift, drukkið og margir urðu veikir, lagðir inn á sjúkrahús. Margir urðu veikir úti í bæ.“

Þar sem að fjöldi manns veiktist var ástandið á spítalanum slæmt, en Ragnar lýsti því í viðtalinu í morgun.

„Þetta var það kvalafullt að málarateymi, sem var að mála sjúkrahúsið… Ópin voru svo mikil að þeir voru sendir heim, málararnir, á mánudeginum eftir Þjóðhátíð. Þetta heyrðist niður í bæ,“

Ragnar ræddi einnig um að fáir tali um málið í Vestmannaeyjum, en aðallega hafi verið hvíslað um það.