Hlynur Davíð Löve heitir ungur læknir sem varð þeirrar gæfu aðnjótandi að bjarga lífi farþega um borð í vél Icelandair frá Alicante til Íslands síðustu nótt. Farþeginn var hætt kominn vegna sjúkdóms síns. Þetta kemur fram í Fréttablaðinu. Snúa þurfti vélinni við og var lent í Dublin og þar var sjúklingurinn fluttur á slysadeild.
Maðurinn komst lífs af en hann var hætt kominn. Um þetta segir í Fréttablaðinu:
„Hlynur var nýbúin að svæfa son sinn og var að horfa á mynd í afþreyingarkerfi Icelandair þegar kallað var eftir lækni. „Ég var sá eini sem gaf mig fram ásamt hjúkrunarfræðingi og saman eyddum við um það bil þremur tímum í að sinna sjúklingnum.“ Maðurinn sem veiktist komst lífs af og þrátt fyrir að Hlynur viti ekki hvernig honum vegnar sem stendur telur hann að sjúklingurinn muni ná sér.
Það leið tæplega hálftími þar til lent var í Dublin í Írlandi. „Ég fór úr vélinni í grenjandi rigninguna í Dublin til að gefa sjúkraflutningafólki skýrslu um atvikið.“ Hlynur segir að vel hafi gengið að hafa stjórn á ástandinu miðað við aðstæður.“
Snör handtök Hlyns, hjúkrunarfræðings og starfsfólks Icelandair eru talin hafa bjargað lífi farþegans.
Hlynur Davíð Löve var í viðtali við DV árið 2017 og þar kom fram að hann fæddist með tvo hjartagalla og þurfti að gangast undir fjölda aðgerða á unga aldri. Þar segir:
„Ég var barn þegar þetta var og man ekki eftir öllu stússinu. Það voru aðallega pabbi og mamma sem höfðu áhyggjur.“ Foreldrar hans óttuðust um líf hans oftar en einu sinni og oftar en tvisvar þegar hann var lítill. „Þetta uppgötvaðist þegar ég var nokkurra vikna eða mánaða og svo fór ég til barnahjartalæknis hér á Íslandi í alls konar rannsóknir og upp komst um þessa galla. Í kjölfarið var ég sendur út til Bandaríkjanna og Bretlands, þar sem framkvæmdar voru aðgerðir á mér. Síðan kom ég heim og var að mestu leyti læknaður en það var eitt skilið eftir.“
