„Ótrúlegt að Bjarni Ben sé ekki spurður út í hvers vegna hann veitti Robert Downey uppreist æru,“ skrifaði píratinn Snæbjörn Brynjarsson á Twitter í dag og sendi athugasemdina til Bjarna Benediktssonar forsætisráðherra, sem er með virkan Twitter-reikning eins og svo margir ráðamenn um allan heim.

Snæbjörn Brynjarsson

Viðbrögð Bjarna við þessari fyrirspurn voru að útiloka Snærbjörn frá Twitter-reikningi sínum þannig að hann getur nú hvorki fylgst með tístum forsætisráðherrans á Twitter né sent honum skilaboð.

Mál Roberts Downey hefur verið mikið í fréttum og umræðunni undanfarið. Hann var á sínum tíma dæmdur í þriggja ára fangelsi fyrir kynferðisbrot gegn unglingsstúlkum. Fyrir skömmu veitti ríkið honum uppreist æru sem meðal annars hefur í för með sér að hann getur nú að nýju starfað við lögmennsku.

Þeir sem skrifa undir vottorð um uppreist æru eru forseti Íslands og forsætisráðherra. Guðni Jóhannesson forseti hefur þegar stigið fram og lýst yfir hryggð sinni vegna málsins en jafnframt sagt að ákvörðunin sé ekki sín, hlutverk forseta í þessum málum sé einfaldlega að veita undirskrift sína.

Snæbirni þykir undarlegt að forsætisráðherra hafi ekki rætt þetta mál við fjölmiðla en hávær krafa er nú í samfélaginu um að lögum um uppreist æru verðu breytt vegna máls Roberts Downey.

Snæbjörn Brynjarsson er virkur í starfi Pírata en hann fæst auk þess við ritstörf og hefur einnig starfað sem leiklistargagnrýnandi hjá RÚV. DV hafði samband við Snæbjörn og spurði hann hvað honum fyndist um að vera útilokaður frá Twitter-reikningi forsætisráðherra:

„Þetta hefur svo sem ekki fengið á mig tilfinningalega, ef þú skilur hvað ég meina,“ segir Snæbjörn en telur þetta háttlag forsætisráðherra ekki vera til fyrirmyndar:

„En þetta vekur upp spurningar um hvort það megi meina manni aðgang að twitter reikningi sem þjóðhöfðingi. Mér finnst þetta rosalega lélegt og ósæmandi. Bara svipað og þegar hann talar ekki við blaðamenn, þetta er verra ef eitthvað er,” segir Snæbjörn. Hann segist gjarnan vilja vita hvernig forsætisráðherra hafi liðið með að kvitta upp á uppreist æru Roberts Downey, komið hafi fram að forsetanum hafi liðið illa með það.