Um 500 skjálftar hafa mælst í Herðabreiðartöglum í nágrenni Öskju. Gæti hrinan verið fyrirboði um eldgos sem gæti jafnvel átt sér stað á næstu vikum. Annar möguleiki er að skjálftarnir séu að losa um þrýsting eftir eldgosið í Holuhrauni. Þetta kom fram í spjalli Gissurar við Ármann Höskuldsson eldfjallafræðing í hádegisfréttum Stöðvar 2.

Stærsti skjálftinn í hrinunni var tæp þrjú stig en verulega dró úr hrinunni í gær og í nótt. Aðspurður hvað sé hægt að lesa úr þessum jarðhræringum segir Ármann að tveir möguleikar séu í stöðunni. Einn möguleikinn er að eftir hið stóra gos í Holuhrauni að svæðið sé að aðlaga sig og hægt og rólega losni um spennu. „Þá endar það með skjálftum og kannski opnast einhverjar sprungur,“ segir Ármann og það sé ekkert til að hafa áhyggjur af. En þá er annar möguleiki fyrir hendi og það gæti þýtt að gos sé í vændum.

„Annars vegar er það þessi kvika sem tróðst Álftadalsdyngju austan jökulsár fyrir mörgum árum síðan og hefur verið að færa sig vestur eftir,“ segir Ármann og bætir við að hegðunin sé nokkuð einkennileg.

„Þegar síðast fréttist til hennar, þá var það á þessu svæði þar sem þessi skjálftahrina er núna. Það gæti þá þýtt að einhver staðar í öskukerfinu gætum við fengið eldgos á næstu vikum eða mánuðum eða árum.“

Segir Ármann að kvikan sé að færa sig nær yfirborðinu og því gæti verið að styttast í að gjósi á svæðinu. Ármann segir að lokum:

„Ekki endilega í námunda við Herðubreið heldur í öskjukerfinu sjálfu því hún er að færa sig inn í Öskjukerfið þegar hún fer svona vestur yfir.“