Söngkonan Pink gaf nýverið út plötuna Hurts 2B Human, en óhætt er að segja að lögin séu afar persónuleg mörg hver. Ballaðan Happy fjallar til að mynda um það þegar að Pink missti fóstur þegar hún var sautján ára gömul, en eitt textabrot er á þessa leið:

„Ég hef alltaf hatað líkama minn síðan ég var 17 ára. Og mér líður eins og líkaminn hati mig.“

Í viðtali við USA Today opnar hún sig enn frekar um þessa reynslu.

„Meiningin á bak við textann er sú að ég hef alltaf verið strákastelpa, með sterkbyggðan líkama fimleikakonu, en þegar ég var sautján ára missti ég fóstur,“ segir hún. „Og ég ætlaði að eignast þetta barn. En þegar þetta gerist fyrir konu eða unga stúlku líður manni eins og líkaminn hati þig og að hann sé brotinn, að hann sé ekki gera það sem hann á að gera.“

Pink telur mikilvægt að opna umræðuna um fósturlát.

„Ég hef oft misst fóstur síðan þá og mér finnst vera mikilvægt að tala um það sem maður skammast sín fyrir, hver maður er í raun og veru og það sem er sársaukafullt. Ég hef alltaf skrifað um það,“ segir hún.

Pink segist hafa leitað til sálfræðings þegar hún var 22 ára, í kringum útgáfu plötu sinnar Missundaztood árið 2001. Hún leitar enn til sama sálfræðings.

„Ég trúi á að takast á við sjálfan sig og koma hlutum frá sér,“ segir söngkonan. „Það sem ég elska við sálfræðitíma er að þeir leiða þig að því sem þú sérð ekki. Það gefur þér eitthvað til að vinna með þó það sé óþægilegt og sársaukafullt.“

Pink hefur verið gift Carey Hart síðan árið 2006. Þau skildu að borði og sæng frá 2008 til 2010 en náðu aftur saman. Þau eiga tvö börn saman, dótturina Willow, 7 ára og soninn Jameson, 2 ára.