„Það hefur komið oft til tals að halda svona „comic con“ eða „nördaráðstefnu“ á Íslandi en núna er þetta loksins að verða að veruleika og er Nexus stór partur af þessari hátíð á þessu ári og þeim komandi“ segir Sveinn Ólafur Lárusson, einn aðstandenda hátíðinnar Midgard Reykjavík.
Þetta verður fyrsta íslenska ráðstefnan þar sem unnendur bókmennta, tölvuleikja, borðspila, bóka, búningaleikja, spilamóta, myndasagna, listamanna, „cosplay“, kvikmynda og þáttasería sameinast á einn stórviðburð.
Ráðstefnan verður haldin í Laugardalshöll helgina 15. til 16. september og er reiknað með þéttri dagskrá og ýmsum gestum. Aðstandendur hátíðinnar eru starfsmenn Nexus, Cosplay Iceland og Nordic Cosplay Championship.
„Ég tel að okkur hafi tekist að blanda saman sérstökum íslenskum brag við þetta erlenda geirasamfélag og ég hlakka til að sjá, já og sýna útkomuna,“ bætir Sveinn við.
Sveinn Ólafur hefur starfað hjá Nexus í rúman áratug og hefur farið á margar ráðstefnur um tíðina. Segir hann að „gott con“ þurfi að vera fjölbreytt og spennandi úrval sem þræðir saman klassískt og nýtt efni í viðfangsefni geira. „Við í Midgard verðum auðvitað að spyrja okkur hvað það er við þessa tilteknu ráðstefnu sem krækir þig inn og heillar, innlendan jafnt sem erlendan gest, og er jafnframt markmið að vera öðruvísi en allar hinar sambærilegu ráðstefnur úti í heimi,“ segir hann.
Á meðal gesta hátíðinnar er Brian Muir, hönnuður búninga og sviðsmynda upprunalegu Star Wars-myndanna, Alien, Willow, Harry Potter og Guardians of the Galaxy. Einnig bregður fyrir leikarinn Jeremy Bulloch sem fór með hlutverk hins alræmda Boba Fett í The Empire Strikes Back og Return of the Jedi.
