Framleiðendur sjónvarpsþáttanna Black Mirror hafa staðfest að kjör Donalds Trump til Bandaríkjaforseta sé ekki markaðsbrella fyrir þessa dystópísku framtíðarþætti, en þriðja sería var nýlega gerð aðgengileg á Netflix.

„Þetta er ekki sjónvarpsþáttur. Þetta er ekki markaðsbrella. Þetta er raunveruleikinn,“ var skrifað á Twitter-reikning þáttanna á miðvikudag eftir að fjölmargir höfðu sagt úrslitin helst minna á atburðarás sem gæti verið teiknuð upp af handritshöfundum þáttanna.

„Ég fíla ekki þennan þátt af Black Mirror #Kosningakvöld,“ „þessi þáttur af Black Mirror er ógnvænlegur,“ og „er það svona að búa í þætti af Black Mirror #kosningakvöld“ voru nokkur dæmi um athugasemdirnar sem birtust á Twitter þegar úrslitin voru ljós. 

Framvinda bandarísku forsetakosninganna þykir minna mikið á atburðarás þáttar í annarri seríu Black Mirror frá 2013, en þar býður teiknimyndapersóna úr vinsælum grínþætti sig fram til bæjarstjórnarkosninga. Teiknimyndabjörninn og kosningabarátta hans minnir um margt á Trump enda býður hann ekki upp á nein stefnumál heldur notfærir sér andúð almennings á stjórnmálum, rífur kjaft og hvetur til ofbeldis, til þess að ná kjöri.

Maðurinn á bak við Black Mirror, Charlie Brooker, hefur sjálfur sagt að sér hafi þótt sá þáttur hafa misst marks og verið allt of fjarstæðukenndur – þar til Donald Trump bauð sig fram til forseta.