Við minnumst Leonards Cohen með hlýju, það var þroskandi að njóta samvista við hann í uppvextinum. Cohen var alltaf okkar maður og mun vera það áfram, þótt nú sé hann kominn í betri heim meðan við dúsum hér.

RÚV sýndi á dögunum heimildamynd um heimsókn Cohens til Íslands árið 1988. Hrafn Gunnlaugsson leikstýrði myndinni og tók viðtal við tónlistarmanninn. Sýnt var frá blaðamannafundi Cohens þar sem hann var umkringdur fjölmiðlamönnum.

Hann svaraði spurningum en maður hafði sterklega á tilfinningunni að fundir eins og þessir væru ekki með því skemmtilegra sem hann tók þátt í. Viðtal Hrafns við Cohen var fínt og þar talaði Cohen meðal annars um trú og syndina og vísað í sögur Biblíunnar. Það var mjög áhugavert að heyra útlistun hans á syndinni.

Við nútímamenn tölum nánast aldrei um synd, okkur finnst syndarhugtakið svo gamaldags, en þarna var maður sem hafði mikið að segja um syndina og fyrirgefninguna. Við fengum svo að sjá frá tónleikum Cohens þar sem hann söng hvert dásemdarlagið á fætur öðru, þar á meðal lagið um Jóhönnu frá Örk sem heyrist ekki oft en er hreint stórkostlegt.

Leonard Cohen skipti máli í lífi fjölmargra og það var gott að eiga þessa kvöldstund með honum.