Kristbjörg Jónasdóttir og Aron Einar Gunnarsson, fyrirliði íslenska landsliðsins í knattspyrnu hafa verið í sambandi í fjögur ár. Þau ætla að gifta sig í sumar en þau eiga eitt barn saman. Kristbjörg er í viðtali við Nýtt líf en þar lýsir hún bónorðinu á þá leið að það hafi verið persónulegt og einlægt og það hafi farið fram fyrstu jólin þeirra saman á heimili þeirra í Cardiff í Wales.

„Ég var ólétt og ég tók eftir því hvað hann var eitthvað upptjúnaður, svona ekki alveg eins og hann sjálfur, bæði í matnum og þegar við vorum að opna pakkana. Það virtist eins og hann væri að flýta sér svo mikið og ég skildi ekkert hvað var í gangi. Þegar allir pakkar voru opnaðir sagðist hann vera með eina aukagjöf handa mér og bað mig að bíða aðeins á meðan hann þyrfti að skjótast upp.“

Kristbjörg segir að Aron hafi síðan kallað á hana og beðið hana um að koma.

„Ég fór upp, þar voru rósablöð á gólfinu sem leiddu mig í lítið fataherbergi sem var tómt fyrir utan kertin sem hann var búinn að setja í allar hillurnar. Þar beið hann mín á hnjánum. Þetta var ótrúlega skemmtilegt augnablik sem fullkomnaði fyrstu jól okkar ein saman.“

Kristbjörg segir svo á öðrum stað í löngu og ítarlegu viðtali í Nýju lífi að hún hafi fundið sálufélaga sinn í Aroni en þau gifta sig í Hallgrímskirkju í sumar.