Kona sem sparkaði unnusta sínum út úr rúminu þeirra og sagði honum að steinhalda kjafti þar sem hún hélt að hann væri að hrjóta komst að því skömmu síðar að hroturnar voru dauðahryglur.

„Ég hélt bara að hann væri að hrjóta svo ég sparkaði honum út úr rúminu. En síðan fann ég að lakið var rennandi blautt og þá áttaði ég mig á því að það væri eitthvað að og kveikti ljósið.“

Þetta segir Lisa Lee sem sá í framhaldinu hvernig unnusti hennar og barnsfaðir, Lewis Little, var orðinn fjólublár í framan og andaði ekki.

Hún hringdi í sjúkrabíl en sjúkraflutningamennirnir tjáðu henni að Lewis hefði látist nokkrum klukkustundum áður. Hljóðin sem hún heyrði frá honum voru því ekki hrotur heldur loft sem fór út úr líkama hans í gegnum raddböndin og út um munninn.

Í samtali við Metro segir Lisa að Lewis hafði verið með hjartasjúkdóm. Þó hafi þeim ítrekað verið tjáð að hann væri ekki talinn í mikilli áhættu. Hún telur að gangráður hefði getað bjargað lífi Lewis sem hafði ítrekað beðið um að fá þesskonar tæki.