Raunveruleikastjarnan Kristin Cavallari mun aldrei fyrirgefa föður sínum, Dennis Cavallari. Hún segir að hann hafi „farið yfir strikið“ gagnvart börnum hennar.

„Margt hefur gerst, hann fór yfir strikið og það eru ákveðnir hlutir sem ég sætti mig ekki við,“ sagði Kristin í útvarpsþætti Page Six.

Kristin á synina Camden, 12 ára, og Jaxon, 11 ára, auk dóttur, Saylor, 9 ára, með fyrrverandi eiginmanni sínum Jay Cutler.

Hún sagði að það væri mikilvægt að axla ábyrgð og að biðjast afsökunar ef maður særir aðra.

„Ekki vera eitthvað: „Jæja, þetta er ástæðan fyrir því að ég gerði það.“ Ég vil ekki að þú verjir sjálfan þig; segðu bara að þér þyki leitt og viðurkenndu það. Þetta er virkilega erfitt fyrir marga,“ segir hún.

„Og þegar þú ferð yfir mörk, eins og pabbi minn gerði, og getur ekki einu sinni tekið einhverja ábyrgð, þá get ég bara ekki haft þig í lífi mínu.“

Hún bætti við mjög ákveðin að hann myndi aldrei aftur verða hluti af lífi hennar og hún hafi fundið fyrir gífurlegum létti þegar hún lokaði á hann fyrir 2-3 árum.