ClubDub mun ekki koma fram á þjóðhátíð í Vestmannaeyjum í ár líkt og til stóð. Vísir greinir frá og vitnar í Jónas Guðbjörn Jónsson, formann þjóðhátíðarnefndar ÍBV, sem segir að samningur við ClubDub hafi byggst á því að hljómsveitin væri skipuð þeim Brynjari Barkarsyni og Aroni Kristni Jónassyni. Nú hafi Aron Kristinn hætt í hljómsveitinni og forsendur samningsins því brostnar.
Brynjar hafði ætlað sér að byrja með raunveruleikaþætti til að finna arftaka Arons. Síðan myndi arftakinn stíga á stokk með Brynjari á þjóðhátíð undir merkjum ClubDub.
Jónas segir að það sé ekki í boði að skipta Aroni út. Samningur hafi verið gerður við bæði Brynjar og Aron, sá samningur sé nú brostinn og muni þjóðhátíðanefnd finna annan flytjanda í staðinn.
Brynjar hefur verið umdeildur undanfarið eftir að hann lét á sér kveða í umræðunni um landamæri Íslands og útlendingamál. Meðal annars flutti hann ræðu á mótmælafundi á Austurvelli þar sem hann sagði íslam vera ógn við lýðræðið á Íslandi og hélt því fram að kommúnískir glóbalistar væru að reyna að taka völdin í samfélaginu.
