Lagið fjallar um þann tilfinningalega sársauka og óvissu sem getur fylgt því þegar náin vinkona fjarlægist þig án þess að þú vitir af hverju.
„Ég tengi ótrúlega mikið við þetta lag og ég veit að fleiri gera það líka,“ segir Gríma sem vann lagið með pródúsernum Jóhanni Steini (Johann Stone), og söngkonunni og lagahöfundinum Malen.
„Stundum á lífsleiðinni lendir maður í sársauka og óvissu, eins og til dæmis þegar náin vinkona fjarlægist án skýringa. Það getur verið eins og það sem kom fyrir mig, þegar ég fór í gegnum tímabil þar sem ég var að glíma við andleg veikindi fékk ég að sjá hverjir voru alvöru vinir mínir. Þetta var eins og að fá blauta tusku í andlitið. Ég spurði vinkonu mína: Af hverju hefurðu fjarlægst mig og hætt að heyra í mér? Af hverju eru þú og fleiri ekki að bjóða mér í hittinga lengur?“
Gríma segir lagatextann útskýra þetta betur. Hlustaðu á lagið hér að ofan.
„Ég vildi gera lag um vinamissi því mér finnst þetta vera algengara núna að fólk sé að missa vini. Svo er það líka oft þannig í lífinu að sumir vinir manns eru bara í lífi manns í vissan tíma og fara svo úr lífi manns, svona er þetta bara stundum,“ segir hún.
Gríma gaf einnig út tónlistarmyndband við lagið sem má horfa á hér að neðan.
Óskar Long leikstýrði myndbandinu og Andri Freyr Gilbertsson og Aron Pétur Ólafsson tóku það upp tónlistarmyndbandið og klipptu það.
Gríma, 30 ára, hefur verið virk í tónlistarsenunni frá árinu 2019.
„Ég hef verið að skapa mér sérstakt rými í íslensku tónlistarlífi með heiðarlegum og áhrifaríkum lögum,“ segir hún og bætir við:
„Ég hef gefið út nokkur frumsamin lög þar sem hver texti og melodía er endurspeglun á mismunandi tilfinningum og sögum. Bæði mínar eigin og fólksins í kringum mig sem ég nota til að búa til lög.
Textarnir mínir, þeir koma frá minni eigin lífsreynslu og reynslu annarra í kringum mig. Þeir snerta við hlustendum með einlægri nálgun á málefni eins og ást, sambandsslit og andleg veikindi og ég hef sterka tengingu við popptónlist og hef hana sem vettvang til að tjá mig á áhrifaríkan hátt.“
„Ferillinn minn hófst samt formlega árið 2018 þegar ég gaf út ábreiðu af laginu Angels On The Moon og það vakti alveg mikla athygli á YouTube. Ég fékk mörg áhorf og það heldur áfram að njóta vinsælda á bæði YouTube og Spotify.“
Síðan þá hefur Gríma haldið áfram að vaxa sem listarkona og komið fram á ýmsum viðburðum.
Hlustaðu á lög Grímu á Spotify eða horfðu á tónlistarmyndböndin á YouTube.
