Ugla Hauksdóttir leikstjóri, leikstýrir tveimur stórum verkefnum sem verða frumsýnd með aðeins mánaðar millibili síðsumars.
Í ágúst frumsýnir FX og Hulu/Disney Plus stórseríuna Alien: Earth, nýjustu útgáfu úr hinum goðsagnakennda Alien-heimi. Ugla leikstýrir þar tveimur þáttum, undir stjórn framleiðandans og höfundarins Noah Hawley (Fargo, Legion), og er þar með ein fárra íslenskra leikstjóra sem hafa fengið að stýra verkefnum af þessari stærðargráðu í bandarísku streymislandslagi. Nýlega kom út stikla fyrir þættina.
Í byrjun september, verður kvikmyndin Eldarnir frumsýnd, en hún byggir á samnefndri skáldsögu Sigríðar Hagalín Björnsdóttur. Ugla leikstýrir myndinni sem fjallar um Önnu Arnardóttur, einn fremsta eldfjallafræðing landsins sem stendur frammi fyrir tveimur hamförum í einu: eldgosi sem ógnar öryggi almennings og ástarsambandi sem gæti lagt hjónaband hennar í rúst. Mikil eftirvænting ríkir fyrir myndinni og hefur hún selst vel víða um heim.
Ugla hefur áður leikstýrt þáttum í þáttaseríunum Hanna (Amazon Prime) og The Power (Amazon Studios).
