Villibráð er tekjuhæsta kvikmynd helgarinnar sem er magnaður árangur þar sem vinsælasta mynd heims Avatar: Way of Water er nýbyrjuð í sýningum.
5606 gestir sáu Villibráð og með hátíðarforsýningunni eru 6355 búnir að upplifa þessa æðislega kolsvörtu gamanmynd sem hefur slegið í gegn hjá kvikmyndahúsagestum og gagnrýnendum – en gagnrýnandi Morgunblaðsins gaf henni fjórar stjörnur og sagði; „…Villibráð er ein skemmtilegasta kvikmynd sem gerð hefur verið hér landi í mörg ár.“
Handritið skrifaði leikskáldið Tyrfingur Tyrfingsson, ásamt Elsu Maríu Jakobsdóttur leikstjóra. Með stærstu hlutverk fara Aníta Briem, Björn Hlynur Haraldsson, Gísli Örn Garðarsson, Hilmar Guðjónsson, Hilmir Snær Guðnason, Nína Dögg Filippusdóttir og Þuríður Blær Jóhannsdóttir.
Myndin var framleidd af Þóri Snæ Sigurjónssyni, Ragnheiði Erlingsdóttur og Arnari Benjamín Kristjánssyni fyrir Zik Zak kvikmyndir í samstarfi við Scanbox Entertainment.
Villibráð er endurgerð af ítölsku verðlaunakvikmyndinni Perfetti Sconoscuti eða Perfect Strangers, sem kom út árið 2016. Myndin hefur verið endurgerð átján sinnum og komst hún því í Heimsmetabók Guinness.
Sjá einnig: Af hverju hefur „Villibráð“ verið endurgerð tuttugu sinnum síðan 2016?
