Luis Suárez verður að öllum líkindum ekki hluti af úrúgvæska landsliðshópnum fyrir Heimsmeistaramótið í sumar samkvæmt nýjustu fréttum frá Suður-Ameríku.

Samkvæmt blaðamanninum Rodri Vazquez hefur Marcelo Bielsa, landsliðsþjálfari Úrúgvæ, ákveðið að skilja hinn 39 ára gamla framherja út undan í 55 manna bráðabirgðahópi sínum fyrir HM í Bandaríkjunum, Kanada og Mexíkó.

Fréttirnar hafa vakið mikla athygli í Úrúgvæ enda er Suárez markahæsti leikmaður í sögu landsliðsins og ein stærsta knattspyrnugoðsögn þjóðarinnar. Margir bjuggust við því að hann fengi eitt síðasta tækifæri með landsliðinu á stórmóti.

Suárez lagði landsliðsskóna á hilluna árið 2024 en hafði nýlega gefið í skyn að hann væri tilbúinn að snúa aftur til að hjálpa liðinu á HM.

Samband Suárez og Bielsa hefur þó verið stirt undanfarin misseri. Framherjinn gagnrýndi argentínska þjálfarann opinberlega síðasta haust og sakaði hann meðal annars um að hafa skapað slæmt andrúmsloft innan hópsins.

Hann sagði einnig að leikmenn væru orðnir þreyttir á vinnubrögðum Bielsa og gagnrýndi meðferð landsliðsins á sumum leikmönnum og starfsfólki á Copa America árið 2024.