Hún hvetur fólk til að hugsa um það sem skiptir virkilega máli; gæðastundir með fjölskyldunni en ekki hvort bakaraofninn sé hreinn eða hvort það sé búið að ganga frá öllum þvotti.
Camilla er tveggja barna móðir og þekkir jólastressið vel. Hún ræddi við fylgjendur sína á Instagram í gærkvöldi og beindi sérstaklega orðum sínum til foreldra.
„Smá hugleiðingar til foreldra, oftast eru það mömmur, sem eru á smá yfirsnúning svona korter í jól. Jólin koma þó að allt sé ekki eftir okkar höfði og upp á tíu. Jólin koma þó að þvottahrúgan sé ekki brotin saman og að allt sé tipp topp inn í öllum skápum. Jólin koma þó að bakaraofninn sé ekki nýþrifinn. Jólin koma svo sannarlega þó við bökum ekki eina smákökusort í viðbót eða sleppum því yfirhöfuð,“ sagði hún og bætti við að hún ætti sjálf erfitt með að taka þetta til sín.
„Ég reyndar viðurkenni að týpan sem ég er, þá virkar það ekki fyrir mig að heyra: „Jólin koma samt.“ Ég fæ bara kvíðakast við að heyra þetta,“ sagði hún kímin.
„Ég skil það og sé það, að manni langar bara að gera vel, manni langar að hugsa fyrir öllu. Og vera svolítið þungamiðjan í því að allir fái sitt og að öllum líði vel yfir jólin. Ég í raun og veru skil það bara manna best. En stundum þegar maður er kominn á smá yfirsnúning er gott að stoppa sig af og hugsa aðeins, eða öllu heldur forgangsraða kannski.“
Camilla sagði að þá reyni hún að sýna æðruleysi. „Eins og ég segi, það er ekkert að því að gera sitt besta og leggja sig fram að allir fái sitt og öllum líði vel, en maður verður að hugsa um sig sjálfan líka,“ sagði hún.
View this post on Instagram
Athafnakonan hvetur foreldra til að hugsa: „Hvað vilja börnin mín um jólin?“
„Ég hugsa það út frá því, hvað vildi ég sem barn. Þau vilja mig, þau vilja gæðastundir með mér. Þau vilja ekki stressið mitt, þeim er drull um ofninn, þvottafjallið og svo framvegis,“ segir hún.
„Ég man bara eftir því sjálf sem barn að það eina sem ég vildi var að einhver myndi stíga út úr eldhúsinu, setjast hjá mér, spjalla við mig, spila við mig og bara vera með mér. Og ef maður hugsar út í það þá er þetta ennþá það eina sem ég vil, gæðatími með fólkinu mínu. Þannig að til þín, sem ert að reyna þitt besta og ert kannski komin á smá yfirsnúning, þetta er allt í lagi. Það eina sem við þurfum, og viljum, er fólkið okkar. Hitt skiptir engu máli.“
