Í september árið 2014 varð mikill gagnaleki eftir að tölvuþrjótar brutust inn á iCloud aðganga hjá stórstjörnum og stálu nektarmyndum af þeim þaðan. Tölvuþrjótarnir herjuðu aðallega á kvenkyns stjörnur, til að mynda urðu tónlistarkonan Rihanna, raunveruleikastjarnan Kim Kardashian, ofurfyrirsætan Cara Delavigne og leikkonan Jennifer Lawrence fyrir barðinu á þeim.
Sú síðastnefnda opnaði sig um það þegar nektarmyndunum var stolið í viðtali við Vanity Fair á dögunum. „Hver sem er getur farið og horft á líkamann minn nakinn án míns samþykkis, hvenær sem er,“ segir Jennifer í viðtalinu. „Einhver í Frakklandi birti þær bara, áfallið mun fylgja mér að eilífu.“
Þetta er ekki í fyrsta skipti sem Jennifer opnar sig um málið. Árið 2017 sagðist hún vera reið vegna þessa. „Mér líður eins og mér hafi verið hópriðið af helvítis heiminum – þú veist, það er ekki ein manneskja sem getur ekki séð þessar persónulegu myndir af mér,“ sagði hún.
„Þú getur bara verið í grillveislu og einhver getur fundið þær á símanum sínum. Það var ómögulegt að komast í gegnum þetta.“