Ungur karlmaður í Georgíu í Bandaríkjunum fékk alvarlegt heilablóðfall eftir meðferð hjá kírópraktor, en mistök lækna á sjúkrahúsi urðu til þess að hann hlaut varanlegan og alvarlegan skaða.

Jonathan Buckelew, sem er í dag 34 ára, fékk flog og missti meðvitund þegar hann var í meðferð á hálsi hjá kírópraktor þann 26. október árið 2015. Hann var fluttur með hraði á sjúkrahús en þar fór heilablóðfall hans framhjá læknum og var hann ekki greindur fyrr en heilum degi seinna.

Töf við greiningu olli því að Buckelew þróaði með sér svo kallað „locked-in“ heilkenni – afar sjaldgæfur taugasjúkdómur sem veldur algerri lömun nema í augnvöðvunum. Þeir sem lifa við þetta ástand eru með meðvitund og geta heyrt, en eru algjörlega ófærir um að hreyfa sig eða tala.

Atlanta News First fjallaði um málið og ræddi við faðir Buckelew, Jack.

Buckelew höfðaði mál gegn kírópraktornum, sjúkrahúsinu og læknunum sem komu að málinu.

Hann fékk samtals rúmlega níu milljarða í skaðabætur.

Buckelew var fyrir þetta virkur í íþróttum og útivist. „Hann vill fara og gera svo margt, hjartað okkar brotnar við að sjá hann svona. Það eru dagar sem hann biður um að það verði slökkt á öndunarvélunum og þeir dagar eru mjög erfiðir,“ segir faðir hans.