Áheyrnaprufur í America‘s Got Talent standa nú yfir og hafa nú þegar nokkrir keppendur fengið gullhnappinn. Næstur á svið var söngvarinn Jimmie Herrod og hann ætlaði að syngja lagið „Tomorrow“ úr söngleiknum Annie.

„Er þér alvara?“ Spyr þá Simon Cowell, dómari í þáttunum og þekktur harðjaxl.

„Vissir þú að mér finnst þetta vera versta lag í heimi? Og þú ætlar að syngja það,“ segir Simon Cowell og segir honum að syngja annað lag.

„Ég er ekki með annað lag,“ segir Jimmie.

„Það eina sem ég get sagt er gangi þér vel,“ segir þá Simon.

Jimmie byrjar að syngja lagið og er ekki lengi að heilla áhorfendur og dómara upp úr skónum. Meira að segja Simon virðist hrifinn og endar þetta með því að hann fær standandi lófaklapp frá Simon og tveimur öðrum dómurum. Eina sem situr kyrr er Sofia Vergara.

„Vá, vá, vá. Ég hata þetta lag ekki lengur,“ segir Simon. „Ótrúlegt, ótrúlegt.“

En Sofia Vergara segist ekki hafa verið hrifin af atriðinu. Á meðan salurinn baular segir Sofia: „En ég elskaði það“ og ýtir á gullhnappinn. Jimmie kemst þá beint áfram í undanúrslit.

Horfðu á þetta magnaða atriði hér að neðan.