Á miðvikudaginn síðastliðinn stigu þjóðþekktir Íslendingar fram í myndbandi frá hlaðvarpinu Eigin Konur og lýstu yfir stuðningi við þolendur ofbeldis. Myndbandið hafði yfirskriftina #ÉgTrúi og voru skilaboðin sú að þolendum ofbeldis eigi að vera trúað.
Degi seinna var myndbandið tekið niður eftir að sögur fóru að ganga um karlkyns þátttakendur í myndbandinu. Í kjölfarið stigu fram tveir karlmenn, sem komu fram í myndbandinu, og viðurkenndu að hafa farið yfir mörk kvenna. Þeir Pálmar Ragnarsson, fyrirlesari og rithöfundur, og Magnús Sigurbjörnsson, stafrænn ráðgjafi og bróðir Áslaugar Örnu Sigurbjörnsdóttur dómsmálaráðherra.
Í gærkvöldi birtu Edda Falak og Fjóla Sigurðardóttir, konurnar á bak við Eigin Konur, yfirlýsingu í Story á Instagram-síðu Eigin Kvenna. Þar kom fram að þær ætluðu að endurbirta og endurklippa mndbandið „því við viljum minna á boðskap myndbandsins. Tilgangur myndbandsins er að styðja við þolendur ofbeldis.“
Myndbandið var endurbirt fyrir hádegi og koma hvorki Pálmar né Magnús fram í því. Áslaug Arna dómsmálaráðherra var harðlega gagnrýnd fyrir sína þátttöku í verkefninu. Hún kemur einnig fram í nýju útgáfunni. Í samtali við Vísi í síðustu viku sagði Áslaug að hún teldi það ekki mistök að hafa ákveðið að taka þátt í verkefninu.
„Ég tók bara afstöðu með því að styðja þær vinkonur mínar og þolendur sem hafa stigið fram í að segja sína sögu,“ sagði Áslaug.
Einn karlmaður bættist við, Álfgrímur Aðalsteinsson sem nýtur mikilla vinsælda á TikTok og Instagram.
Horfðu á myndbandið hér að neðan.
View this post on Instagram