Fjöllistakonan Ellý Ármannsdóttir gengur í það heilaga í sumar og játast unnusta sínum, Hlyni Jakobssyni. COVID-19 faraldurinn hefur svo sannarlega sett strik í reikninginn í undirbúningnum, sem stendur nú sem hæst. Ellý og Hlynur ganga upp að altarinu í Dómkirkjunni laugardaginn 13. júní en planið var að fljúga síðan á vit ástarinnar í Mílanó með barnaskarann. Brúðkaupsferðinni hefur hins vegar verið frestað vegna faraldursins.

„Ítalíuferðin verður ekki farin en við fáum að breyta miðunum,“ segir Ellý, að vonum sár með að komast ekki í ferðina. Hún segir það þó litlu máli skipta í stóra samhenginu. „Svo lengi sem Hlynur mætir í kirkjuna þá skiptir allt annað engu máli.“

Aðspurð hvernig undirbúningurinn fyrir stóra daginn gangi segir Ellý hann ganga vonum framar, en í vikunni fékk hún kærkomna hjálp frá systur sinni, Eik Gísladóttur, með það sem veldur mörgum verðandi brúðum hugarangri – sjálfan brúðarkjólinn.

„Eik systir lánaði mér kjól. Hún keypti hann í Harvey Nichols í Manchester fyrir mörgum árum og hann smellpassar á mig,“ segir Ellý himinlifandi. „Svo verð ég í strigaskóm, sandölum eða berfætt. Kjóllinn er frá einhverju svaka merki – Alexander McQueen. Kate Middleton er alltaf í Alexander McQueen. Hann er kremaður á litinn, úr silki og afskaplega þægilegur,“ segir Ellý, full tilhlökkunar fyrir sumarbrúðkaupinu.