Leikarinn Jason Momoa opnar sig um erfitt tímabil í lífi sínu. Í viðtali við InStyle segir leikarinn frá því hvernig hann glímdi við fjárhagslega erfiðleika eftir að hafa leikið í Game of Thrones árið 2011.
Jason fór með hlutverk Khal Drogo í þáttunum. Þættirnir urðu ótrúlega vinsælir, en Jason lék aðeins í fyrstu tíu þáttunum og mótleikarar hans sem héldu áfram í þáttunum nutu gífurlegar velgengrar.
Jason og eiginkona hans, Lisa Bonet, eiga saman tvö börn og býr fjölskyldan í Los Angeles. Hann segir að eftir þættina hafi hann átt erfitt með að borga reikninga.
„Ég meina, við vorum að svelta eftir Game of Thrones. Ég fékk enga vinnu. Það er mjög erfitt þegar þú átt börn og ert stórskuldugur,“ segir hann.
Það var erfitt uppdráttar næstu árin hjá Jason og fjölskyldu, þar til hann nældi sér í stórhlutverk sem Aquaman í kvikmyndinni Justice League. Síðan þá hefur hann farið með aðalhlutverkið í kvikmyndinni Aquaman og stendur til að framleiða Aquaman 2. Hann mun einnig fara með hlutverk Aquaman í sjónvarpsseríunni Zack Snyder‘s Justice League sem kemur út á næsta ári. Það er það mikið að gera hjá honum þessa dagana að Jason segist vera bókaður út árið 2024.
Það er því óhætt að segja að innistæðan á bankareikning hans hefur breyst til muna.