Fjölmargir þekktir Íslendingar drýgja tekjurnar með því að leigja út íbúðir sínar í gegnum Airbnb. Þessar upplýsingar má nálgast á heimasíðu Sýslumannsins á höfuðborgarsvæðinu. Áður hefur verið greint frá því að þingmennirnir Ágúst Ólafur Ágústsson, þingmaður Samfylkingarinnar, Helgi Hrafn Gunnarsson, þingmaður Pírata, og Þorsteinn Víglundsson, þingmaður Viðreisnar, stæðu í slíkri útleigu. Að auki er eiginkona Guðlaugs Þórs Þórðarsonar utanríkisráðherra skráð fyrir íbúð sem er nýtt með þessum hætti.
En það eru fleiri þjóðþekktir Íslendingar sem drýgja tekjurnar með því að leigja út íbúðir sínar. Í þeim hópi eru landsliðsmennirnir Rúrik Gíslason og Alfreð Finnbogason, prófessorinn Hannes Hólmsteinn Gissurarson, virkjunarsinninn Kristinn H. Gunnarsson. Í helgarblaði DV má lesa um íbúðir margra þekktra Íslendinga en í þessari umfjöllun ætlum við að skoða íbúð hins vinsæla Ruriks Gíslasonar sem eignaðist yfir milljón aðdáendur á meðan HM í knattspyrnu stóð yfir.
Íbúð Rúriks, sem hann leigir út í Garðabæ, er í anda landsliðsmannsins, stílhrein og glæsileg. Nóttin kostar 175 Bandaríkjadali eða um 18.500 krónur. Rúrik lætur fyrirtækið Heimaleigu sjá um starfsemina á meðan hann einbeitir sér að fótboltanum og samfélagsmiðlum. Rekstrarstjóri Heimaleigu sem þykir sjá vel um sína kúnna er er Frans Garðarsson en kona hans er hin þekkta snapchat-stjarna Sólrún Diego.
Í júlí eru fjórir dagar lausir í íbúð Rúriks Gíslasonar og tíu dagar í ágúst. Í september eru svo 20 dagar lausir. Íbúð Rúriks hefur fengið 31 umsögn og fimm stjörnur af fimm mögulegum. Einn þeirra fjölmörgu sem hefur leigt íbúðina segir:
„Nútímaleg og stílhrein íbúð. Frábært útsýni frá svölum og hverju herbergi. Ef ég kæmi aftur til Íslands myndi ég gista aftur hér.“
Eins og áður segir varð Rúrik frægur víða um heim eftir HM í Rússlandi. Hinir fjölmörgu aðdáendur eiga nú kost á að sofa í íbúð knattspyrnukappans fyrir tæpar 20 þúsund krónur.