Minningarsjóður Einars Darra hefur gefið út myndband sem er tileinkað þeim sem hafa látið lífið vegna eða í tengslum við misnotkun á lyfseðilsskyldum lyfjum eða öðrum fíkniefnum.
Aðstandendur tóku þátt í verkefninu með því að gefa leyfi fyrir birtingu á mynd af ástvini sínum.
Í myndbandi þessu koma upp myndir sem sýna einungis brota brot af þeim einstaklingum sem látið hafa lífið á einn eða annan hátt í tengslum við misnotkun á lyfseðilsskyldum lyfjum og öðrum fíkniefnum. Lyfjaeitranir eru fleiri, sjálfsvígin eru fleiri, bílsslysin eru fleiri og svona mætti því miður lengi telja.
Bak við hverja dánartölu er einstaklingar sem var og verður ávallt elskaður og dáður af fjölda manns, fráfall þeirra veldur þeim öllum gnístandi sorg. Hvíl í friði elsku dýrmætu einstaklingar, minning ykkar lifir í hjörtum fjölskyldna og vina um aldur og ævi.
Lagið heitir I Was Here og er flutt af Maríu Agnesardóttur við undirspil Vignis Snæs Vigfússonar og faglega aðstoð Margrétar Eirar.
Aníta Rún Óskarsdóttir gerði myndbandið.
Það er löngu kominn tími á að við tökum höndum saman, valdeflum okkur öll unga sem aldna með fræðslu og forvörnum, heiðrum og minnumst þeirra sem hafa látið lífið, styðjum þá sem þurfa aðstoð, stöndum með þeim sem berjast í bata sínum á hverjum degi og spornum við því að fleiri einstaklingar fari frá okkur allt of snemma. Þetta varðar okkur öll.
Ég á bara eitt líf og þú líka.
